ప్రియమైన ...... ll by mercy margaret ll
---------------------------------------------
నువ్వు గుర్తొచ్చినప్పుడు
గోడ వైపు మరలుతాను కాని
నా కన్నీళ్లు తుడిచేందుకు గోడకి చేతులు లేవుగా
వినడం తప్ప ఏం చేయగలదు
ఎదో రాయాలని మొదలు పెట్టిన ప్రతి సారి
మనసు నీ ఆలోచనలని తింటూ
మళ్ళీ నా వైపు ఎగిరిరానంటుంది
అందుకే దానితో నేను అక్కడే ఉండిపోతాను
నీ జ్ఞాపకపు ఇంటి తలుపు తడుతూ
నువ్వు రాసిన ప్రతి పదాన్ని
పది సార్లు చదువుతుంటాను ..
చదివినంత సేపు నా ప్రక్కనే ఉండి రాసిన క్షణాలు
గుర్తుచేసుకుంటూ ..
చూసి చూసి జ్వారానికి జాలేసింది మరి
అందుకే నన్ను కౌగలించుకుని
నిన్ను మరిపిస్తూ ఈ లేఖ రాయిస్తుంది
ఎదురు చూపులతో
అందుకోగానే సమాధానం ఇస్తావు కదూ
-------------- by Mercy Margaret (17/11/2012 ) -----------------
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
ll నీ పేరు ll by Mercy Margaret
--------------- ---------------------
ఉదయం పొగ మంచులోంచి ఒక కిరణం
నీ పేరేనా ?
నా కళ్ళను పొడుస్తూ నిన్ను వెతికేలా
నా మెలుకువవుతుంది
నువ్వే నా ఆలోచన ఊటవా ?*
పొగలు పోగలుగా నీపేరు
నా పెదాల వనాలను పలకరిస్తుంది
వింటున్నావా ?
జీవితపు మలుపు చివర నీ పేరే
నాకు మజిలీ అయి కనిపిస్తుంది
నా గమ్యం నువ్వేనా ?
నా గాయానికీ నువ్వు బాగానే పరిచయం
నువ్వు కనబడగానే స్రవిస్తున్న రక్తంతో
నీ పేరును కలవరిస్తుంది
ఔషదమనా ?? లేక ఆరొపిస్తూనా ??
--------- by Mercy Margaret (16/11/20)--------
~~~ ~~~~~~~~~~~~~~~~~~~~~~~~~~~
l l తమసోమా జ్యోతిర్గమయా l l by Mercy Margaret
నా హృదయం
విరిగిన ప్రమిద
దీపానికి పనికి రాను
త్రొసివేయబడి
త్రొక్కబడుతూ
రోదిస్తూ ఇలా పెంటకుప్పపై
ఒక స్వరం అడుగుతుంది
ఆ విరిగిన హృదయమే కావాలని
చెల్లా చెదురై విరిగిపడిఉన్న
హృదయ ప్రమిదను
ఆరిపోయిన ఆత్మ దీపాన్ని
మళ్లీ నేను వెలిగిస్తానని
పనికిరాదని ప్రక్కకు నెట్టిన
నిన్నే వాడుకుంటానని
ఎవరని అడిగా
పరమకుమ్మరన్నాడు
లోకానికి వెలుగును
నిన్నూ వెలిగిస్తానన్నాడు
సమర్పించుకున్నా
అలాగే
నన్ను పిలుస్తున్న జీవపు వెలుగుకు
నా యేసునకు ..
---------------by Mercy Margaret (13/11/2012)-------
l l ఒక పరిచయం ముగుస్తూనే l l by Mercy Margaret
-------------------------------------------------------------------
ఒక పరిచయం ముగుస్తూనే
రెండు
అపరిచిత ఆకులను కుడుతూ
పూచిన పువ్వు రాలిపోతూ
సంభందపు సుగంధాన్ని
గుర్తుగా మిగిల్చి పోతుంది
ఒక పరిచయం ముగుస్తూనే
పగలు నుండి రాత్రిని
వేరు చేసె కవ్వమేదో
మనసుని చిలికి
జ్ఞాపకాల వెన్నని చేతిలో
చంద్రుని ముద్దగా ఇచ్చి పోతుంది
ఒక పరిచయం ముగుస్తూనే
తలుపులను మూసినా
ఖాలీ సందులనుంచి ప్రయానిస్తూ
ఒక రాగం మూసిన చెవుల గోడలను కూల్చుతూ
అందమైన ఉద్యానవనాలను
చెవులకు వేలాడదీస్తుంది
ఒక పరిచయం ముగింపు ..
ముగింపు కాదది
మరో జన్మ కోసం
అడుగులు వేస్తున్న ఆత్మ తపస్సు
మూసుకు పోయిన కళ్ళ వెనక కధలు రచిస్తూ
గాలితో జతకట్టి
హృదయాన్ని స్పృశిస్తుంది..
------ by mercy margaret .~~ (9/11/2012)~~ -----------